Brief fan de Korintiërs oan Paulus
| Brief fan de Korintiërs oan Paulus | ||
| algemiene gegevens | ||
| auteur | anonimus | |
| taal | Aldgryksk | |
| foarm | non-fiksje | |
| sjenre | religiosa | |
| skreaun | ±160 n.Kr. | |
It Brief fan de Korintiërs oan Paulus, ek wol koartwei Korintiërs oan Paulus neamd, is in algemien as apokryf beskôge tekst út 'e earste of twadde iuw, dy't oarspronklik ûnderdiel útmakke fan 'e Hannelingen fan Paulus, mar letter dêrút losmakke waard en as selsstannich geskrift sirkulearre. It brief hâldt út in reäksje te wêzen fan 'e ier kristlike gemeente yn it Grykske Korinte op 'e beide nijtestamintyske brieven dy't de apostel Paulus dêroan skreau (ntl. it Earste Brief oan de Korintiërs en it Twadde Brief oan de Korintiërs).
Yn Korintiërs oan Paulus wurdt de lear fan Simon de Tsjoender (sjoch: Hannelingen fan de Apostels 8:9-25) beskreaun, mei dêrûnder de ideeën dat God net almachtich is; dat de weropstanning ferfalske wie; dat de Kristus net wierlik de lichaamlik ynkarnearre God wie (de lear fan it dosetisme); dat de wrâld troch ingels skepen is (de Demiurch); en dat de Joadske profeten mis wiene. In beskie fan Paulus, it pseudepigrafysk Tredde Brief oan de Korintiërs makke ek ûnderdiel fan Hannelingen fan Paulus út. Korintiërs oan Paulus kin begrepen wurde as in oprop of oantrún om ketterske tinkbylden te bestriden; Korintiërs oan Paulus wie dus inkeld nedich as oanlieding foar 3 Korintiërs, en moat sadwaande it wurk wêze fan in otterdokse kristen dy't it gesach fan Paulus brûke woe as stôk om syn dosetyske en gnostyske tsjinstanners mei te slaan.
Nettsjinsteande it feit dat Korintiërs oan Paulus yn 'e Aldheid al rûnom erkend waard as in ferfalsking, hat it dochs in hoartsje diel útmakke fan 'e kanon fan 'e Armeensk-Otterdokse Tsjerke.
| Boarnen, noaten en/as referinsjes: |
|
Foar boarnen en oare literatuer, sjoch dizze side. |