Hori Jasuo
| Hori Jasuo | |
|---|---|
 Aprilo 2008 | |
| Persona informo | |
| Naskiĝo | 17-an de decembro 1941 (82-jaraĝa) en Tokio,  Japanio
|
| Lingvoj | Esperanto |
| Nacieco | japano |
| Ŝtataneco | Japanio 
|
| Okupo | |
| Okupo | esperantisto (1960–) profesoro
|
| Esperanto | |
| Verkis en Esperanto | Raportoj el Japanio |
HORI Jasuo (japane: 堀 泰雄 [hori jasuo]; hepburne: Hori Yasuo, naskiĝis la 17-an de decembro 1941) estas japana esperantisto, verkisto kaj honora membro de UEA[1].
Vivo
[redakti | redakti fonton]
Li naskiĝis en Tokio en 1941 kaj kreskis en la gubernio Gunma. En 1965 li finis studadon en la universitato de Kioto kaj poste instruis la anglan lingvon en altlernejoj kaj universitatoj.
En 1960 Hori Jasuo memlernis Esperanton. De 1993 ĝis 2014 li estis estrarano de la Japana Esperanto-Instituto. Dum 12 jaroj li ĉefredaktore respondecis pri La Revuo Orienta kaj ekde 2001 estas redaktoro de Esperanto en Azio, organo de la Azia Komisiono de UEA (KAEM). Li estis ties prezidanto de 2001 ĝis 2006. Li partoprenis en dudeko da UK-oj, de Varsovio (UK 1987) ĝis Lille (UK 2015) kaj en ĉiuj 8 aziaj kongresoj.
Dum la jaroj 2007 ĝis 2010 li estis estrarano de UEA pri landa kaj regiona agadoj.
Li estis honorita per la Premio Oosaka en 2004 pro la agado en KAEM kaj pro la eldono de Raportoj: Ekde la jaro 1998 li verkas serion de Raportoj el Japanio - ĉiun jaron li eldonas volumon pri la antaŭa jaro. En 2019, la numero atingis 22.
Li estis honorita per la premio Onisaburo Deguĉi de UEA en 2011.
En 2009 li iniciatis la Internacian Esperanto-Sumoon, por ke esperantistoj legu pli multe da Esperanto-libroj. En januaro 2016 okazis la 38a Esperanto-sumoo, en kiu partoprenis 277 homoj el 29 landoj. Ĝi multege kontribuas al la libro-kulturo de Esperanto. Li celas 500 partoprenantojn en du jaroj. ILEI morale subtenas la Esperanto-Sumoon.
En 2010 li iniciatis Societon por parkere kanti la himnon Espero en klopodo antaŭenigi parkeran scipovon de la Esperanto-himno kaj per tio doni al la esperantistoj pli da memfido pri ilia Esperanto-kapablo.
Krome li faris 6-foje prelegturneojn en Francio, kaj kontribuis al amikeco inter la du landoj, kaj precipe post 2011, kiam okazis la Japana Katastrofo, li prelegis pri la temo: "Japanio post la katastrofo".
De la 11-a de marto 2011 li regule informadis la esperantistaron pri la evoluo de la situacio en Japanio kaj raportadas rektajn spertojn. Ĉiuj raportaĵoj aperas sur la retejo de SAT[2] kaj ankaŭ en la franca kaj esperanta sur la retejo de Espéranto-Indre en la rubriko Nouvelles du Japon Arkivigite je 2018-12-20 per la retarkivo Wayback Machine. Ekzemple li prelegis prie dum la 90-a SAT-Kongreso 2017 en Gimpo-Seulo.[3]
La 15-an de decembro 2018 aperis la novaĵo, ke li estas elektita Esperantisto de la Jaro 2018.
Verkoj
[redakti | redakti fonton]Hori Jasuo verkis:
- Kantu Nian Naŭan Simfonion (en la japana).
- Angla Gramatiko Cougar (en la japana kaj la angla).
- Raportoj el Japanio (22 volumoj), aperanta ekde 1997.
- Invito al Esperanto (en la japana kaj Esperanto).
- 1400 citaĵoj klasifikitaj laŭ gramatikaj eroj (en la japana kaj la angla).
- Monatoj tra la Mondo (verkita de diverslandaj 11 esperantistoj).
- Vivoj tra la Mondo (verkita de 11 diverslandaj esperantistoj).
- Ĉiutaga vivo tra la Mondo. Eldonejo Horizonto, 2018. 240 p. ISBN 9784939088391.
Li estas regula kunlaboranto de la gazeto Monato kaj ankaŭ regule verkas por Sennaciulo.
Eksteraj ligiloj
[redakti | redakti fonton]- Taglibro de nia Kamarado Jasuo HORI dum la japanaj katastrofoj sur la retejo de Sennacieca Asocio Tutmonda
- Stanislavo Belov (2020-03-13) “Ĉiutaga vivo tra la Mondo” – ĉarma amatoraĵo (esperante). Blogger. Arkivita el la originalo je 2020-03-13. Alirita 2020-03-13 . (recenzo pri la libro)
Referencoj
[redakti | redakti fonton]- ↑ Gazetaraj Komunikoj de UEA: N-ro 463 (2012-07-30)
- ↑ Arkivita kopio. Arkivita el la originalo je 2012-07-29. Alirita 2011-06-05 .
- ↑ Kongreslibro, SAT, Gimpo, 2017. paĝo 30
