L'occhio del male
|
C'l artìcul chè 'l è scrit in
Miranduléś |
 Thinner
| ||
| L'occhio del male | ||
 Mantegna e Burke in na figùra dal film | ||
| 'L òć dal mâł 1996 | ||
|---|---|---|
| Regìa: Tom Holland | ||
| Scritōr: Stephen King Michael McDowell • Tom Holland | ||
| Atōr: Robert John Burke • Michael Constantine Joe Mantegna • Kari Wührer • Lucinda Jenney Bethany Joy Lenz • Time Winters • Walter Bobbie | ||
| Müsica: Daniel Licht | ||
| Léngua: Ingléś | ||
| Dürä dal film: 92 minüt | ||
| Nasiōṅ: Stat Unî | ||
L'occhio del male (’L òć dal mâł) 'l è 'n thriller ad scarésa dal 1996 ad Tom Holland trat da 'l rumànś umònim ad Stephen King che chè al fà 'n cameo in dla part dal farmacìsta. 'L è stâ girâ in dal Maine e a Portsmouth in dal New Hampshire.
Custâ quatórdas migliòṅ ad dòlar a 'l incìrca, al 'n à fat sù da piò ad quìndas.
Sunt
'L avucàt William Halleck (Robert John Burke), dit Billy, 'l è 'n budlòṅ spuśâ cun la biónda Heidi (Lucinda Jenney) e al gh'à na baghéta, la Linda (Bethany Joy Lenz). 'L à péna diféś in un prucès un boss dal crìmin cgnusû c'n al scutmàj ad "The Hammer", Richie Ginelli (Joe Mantegna).
Na nòt, mént'r al gira in màchina distràt par via 'd sò mujér ch'l'éra drē a śbuchinàr-al, al perd al cuntròl e al mét sóta na sigàgna in là c'n i an, la Suzanne Lempke (Irma St. Paule), ch'la mōr schisàda. 'L óm però al la fà frànca parchè 'l incidènt 'l è badśâ cuma na daśgràsia. Al pàdar dla vitma, Tadzu Lempke (Michael Constantine), un vèć tarulî ad 106 an, al gh ingùra di càncar e 'l al maladìs tucànd-'g al grugn dgénd «Più sutìl». 'L avucàt al taca a pèrdar péś e a 'l inìsi 'l è dimóndi cuntènt, anc s'al magna dimóndi la pansa la cala listés. Dòp però l’Heidi la s mét in pinsēr e la 'l pòrta da 'l dutōr Mike Houston (Sam Freed), cun Billy ch'al créd che chi lōr dū i gh fàgan i còran.
In cal mént'r anc àtar dū parsòni i aṅ patî la maledisiòṅ. A s trata dal giùdas Cary Rossington (John Horton) e dal cap dla pulisìa Duncan Hopely (Daniel von Bargen) ch'i 'l aṅ jutâ in dal prucès. Cary al taca a 'vér la pèla cuma qvéla dna luśèrta. Billy al gh'à pôc tèmp da scampàr e al gh'à da catàr Tadzu in présia par dmandàr-'g ad scanślàr la maledisiòṅ ch'al gh'à fat.