Beretta M1938
| Beretta Modello 1938 | |
|---|---|
 Ur bistolenn-vindrailher Beretta 1938, stumm 38A, dezhi ur c'huzh-kanol didoullet | |
| Kinnig | |
| Bro |  Rouantelezh Italia
|
| Mont en-dro | Pistolenn-vindrailher damaotomatek / aotomatek |
| Munision | 9 × 19 mm Parabellum |
| Produer | Beretta |
| Ijiner | Tullio Marengoni |
| Bloavezh ijinañ | 1935 |
| Mare produiñ | 1938 - 1975 |
| Pouez ha muzulioù | |
| Mas (hep kartouchenn) | Stumm 38A : 4,2 kg Stumm 38/42 : 3,27 kg Stumm 38/49 : 3,25 kg |
| Hirder | Stumm 38A : 946 mm Stumm 38/42 : 800 mm Stumm 38/49 : 798 mm |
| Hirder ar c'hanol | Stumm 38A : 315 mm Stumm 38/42 : 213 mm Stumm 38/49 : 210 mm |
| Perzhioù all | |
| Hed-tenn pleustrek | 100 m |
| Tizh mont e-maez ar boledoù | Stumm 38A : 420 m/s Stummoù all : 380 m/s |
| Lusk-tennañ | Stumm 38A : 600 tenn/mn Stummoù all : 550 tenn/mn |
| Endalc'h | Karger-fiñv 10, 20, 30 pe 40 kartouchenn |
| Lezenn | |
| Rummad e Bro C'hall | A |
Ar Beretta Modello 1938, anvet ivez Beretta MAB 38 (italianeg : Moschetto Automatico Beretta Mod. 1938), zo ur bistolenn-vindrailher savet gant an embregerezh italian Beretta ha produet adalek 1938. Implijet e voe gant an arme italian ha nerzhioù un nebeud broioù all e-pad ha goude an Eil Brezel-bed.
Deskrivadur
[kemmañ | kemmañ ar vammenn]Tullio Marengoni, ijiner en embregerezh Beretta, a savas an arm e 1935[1]. Choazet e voe gant an arme italian ha produet adalek 1938 dindan an anv 38A. E stumm kentañ a oa solut-tre ha fiziapl abalamour e oa savet diwar ur blouc'h dir. Un draen doubl a oa dezhi, unan evit an tenn aotomatek hag unan evit an tenn e mod damotomatek[2]. Kambret e voe evit kartouchennoù 9 mm Parabellum implijet en armoù alaman ar memes mare, ha pourvezet e oa da gentañ gant ur c'harger 20 tenn. Brudet e oa evit bezañ resis e-keñver ar pistolennoù-mindrailher all[3].
Stumm 38/42
[kemmañ | kemmañ ar vammenn]Ker e oa ar stumm 38A da broduiñ, ha diaesoc'h-diaesañ kavout danvezioù kentañ a-feur ma pade ar brezel. E 1942 e kinnigas Beretta ur stumm nevez, hag a voe anvet M38/42. Savet e oa e tol gwasket, berroc'h e oa e ganol ha tennet e voe e guzh-kanol didoullet. Berraet e voe ivez ar fust dindan e ganol[4], ha tennet e voe dioutañ ar pezh evit stagañ ur vaionetez. Kresket e voe endalc'h e garger da 40 kartouchenn[3].
Stummoù all
[kemmañ | kemmañ ar vammenn]Stummoù all a voe produet e-pad pe goude an Eil Brezel-bed, dezhe kemmoù bihan[5] :
- M38/44 (1944) : stumm ar c'hanol, kouch a c'halled plegañ
- M38/49 (1949) : surentez, kalite an armoù produet o wellaat goude fin ar brezel
- Modello 1 (1941) : stumm arnodel evit an harzlammerien, dezhañ ul lamm plegus
- Modello 2 (1951) : stumm evit an harzlammerien, heñvel ouzh ar Modello 1 met gant surentez hag elfennoù all eus an M38/49
- Modello 3 (1955) : stumm deveret eus ar Modello 2, gant ul lamm deleskopek
- Modello 4 : heñvel ouzh an 38/49 met dezhañ un anv disheñvel
- Modello 5 : tost-heñvel ouzh ar Modello 4, gant ur sistem surentez disheñvel
Implijerien
[kemmañ | kemmañ ar vammenn]Implijet e voe an arm gant arme Italia eus 1938 betek ar bloavezhioù 1960 pe 1970. Ar Wehrmacht alaman[2] a resevas un nebeud skouerennoù anezhañ e-pad an Eil Brezel-bed, evel an arme roumanat (5 000 skouerenn)[6]. Goude ar brezel e voe gwerzhet da vroioù a bep seurt, evel Siria, Irak, Indonezia, Yemen pe Maroko. Alamagn a brenas stummoù 38/49 e 1951 evit e warded-harzoù, ar Bundesgrenzschutz. Anvet e voent MP1 en ur mod ofisiel eno[5].
-
Ur soudard eus ar Republik Sokial Italian (1943-1945), gantañ ur stumm 38A -
Harzlammerien italian (dirak) hag alaman (a-dreñv) war talbenn Anzio-Nettuno, miz Ebrel 1944. Un M38A a weler ouzh kein an Italian. -
Ur skritell bropaganda faskour, warni ur Beretta M1938 (testenn : Labourat ha stourm, evit ar vammvro, evit an trec'h)
.jpg)
Daveennoù
[kemmañ | kemmañ ar vammenn]- ↑ (fr) Pistolet-mitrailleur Beretta M1938 A, SecondeGuerre.net (lennet d'ar 15/10/2024)
- ↑ 2,0 ha2,1 (fr) McNAB Chris, Armes à feu Encyclopédie visuelle, L'Imprévu, 2022, pp. 208-209
- ↑ 3,0 ha3,1 (fr) ROB Houston, STROYAN Christine (renerezh), Armes à feu de légende, Larousse, 2019, p. 209
- ↑ (fr) McNAB Chris, Armes à feu Encyclopédie visuelle, L'Imprévu, 2022, p. 217
- ↑ 5,0 ha5,1 (en) POPENKER Maxim, Beretta M1938, Modern Firearms (lennet d'ar 15/10/2024)
- ↑ (fr) Pistolet mitrailleur Beretta M1938 contrat roumain, SecondeGuerre.net (lennet d'ar 15/10/2024)
