Saturnus

De Saturnus oder uf tütsch Saturn (latiin. Sāturnus, -ī) isch i de römische Mythologi de Gott vom Acherbau. Er isch mitem griechische Kronos gliichgsetzt wore. Bi de Etrusker hett er Satre ghaisse. I de Chaiserzitt isch er au mitem Osiris oder Serapis vergliche wore.

Noch de röömische Saag isch de Saturnus ursprüngli e König vo Latium gsii. Er hett a de Mentsche de Acherbau biibroocht und e goldigs Zittalter biwörkt. Er isch au e chthonische Gott gsii und het zäme mit de Göttin Lua chöne Vernichtig bringe. Sis Fest, d Saturnalie, isch am 17. Dezember gfiiret wore.

Sini Frau isch d Fruchtgöttin Ops, wo mit de griechische Rhea gliichgsetzt woren isch. Er isch de Vatter vom Picus ("Specht") gsii, wo noch em König woren isch. Demm si Soo, de Faunus isch denn de Vatter vo birüemte König Latinus, wo de Aeneas uufgnoo hett.

Uursprüngli sölled ufem Kapitol z Room em Sarturnus Mentsche gopferet wore sii. De Hercules heb denn die Mentscheopfer ersetzt dör Cherze und Statuette. Siin Tempel isch ane 497 v. Chr. baut wore. I dem Tempel isch Staatsarchiv und d Staatskasse vo de Römer gsii. Sini Statue i dem Tempel hett i de Hand e Segiss ghaa und sini Füess sind mitere Schnuer us Wule gfesslet gsii, womer a de Saturnalier glöst hett.