Prinses Margaret, Gravin van Snowdon

Prinses Margaret
Gravin van Snowdon
Gebore	21 Augustus 1930 Glamis-kasteel, Skotland
Volle naam	Margaret Rose
Oorlede	9 Februarie 2002 (op 71), Londen, VK
Eggenoot	Antony Armstrong-Jones, 1ste Graaf van Snowdon (6 Mei 1960 – 11 Julie 1978, geskei)
Kinders	David Armstrong-Jones, burggraaf Linley Lady Sarah Chatto
Vader	George VI van die Verenigde Koninkryk
Moeder	Elizabeth Bowes-Lyon

Prinses Margaret, gravin van Snowdon (Margaret Rose; 21 Augustus 1930 – 9 Februarie 2002) was die jongste dogter van koning George VI van die Verenigde Koninkryk en sy vrou, koningin Elizabeth, en die enigste sibbe van koningin Elizabeth II.

Kinderjare

Margaret is in Glamis-kasteel in Skotland gebore. Sy het ’n groot deel van haar kinderjare in die geselskap van haar ouers en ouer suster deurgebring. Haar lewe het in 1936 drasties verander toe haar pa se broer, koning Edward VIII, abdikeer om met die Amerikaner Wallis Simpson te trou wat twee keer geskei was. Margaret se pa het koning geword en haar suster die eerste aanspraakmaker op die troon, met haar as tweede aanspraakmaker.

Tydens die Tweede Wêreldoorlog het die susters in Windsor-kasteel gewoon, ondanks voorstelle dat hulle eerder na Kanada gestuur word. Gedurende die oorlog was Margaret te jonk om amptelike pligte na te kom en het sy haar studies voortgesit.

Liefdeslewe

Prinses Margaret in 1965.

Ná die oorlog het sy verlief geraak op die lugmagkolonel (group captain) Peter Townsend. In 1952 is haar pa oorlede, het haar suster koningin van die Verenigde Koninkryk geword en is Townsend van sy eerste vrou geskei. Hy het Margaret vroeg die volgende jaar die jawoord gevra.

Baie mense in die regering het gevoel hy is nie ’n geskikte man vir die koningin se 22-jarige suster nie omdat hy 16 jaar ouer as sy was en die Anglikaanse Kerk het geweier om die huwelik van ’n geskeide man goed te keur.

Die Britse lugmag het Townsend na Brussel gestuur. Margaret het van ’n huwelik met hom afgesien en in 1960 ’n huweliksaanbod van die fotograaf Antony Armstrong-Jones aanvaar. Hy het ná die troue die titel graaf van Snowdon ontvang.

Die seremonie was die eerste koninklike huwelik wat op televisie uitgesaai is en 300 miljoen mense het wêreldwyd daarna gekyk. Die meeste koninklike families in Europa het egter haar huwelik met ’n fotograaf afgekeur; koningin Ingrid van Denemarke was al buitelandse koninklike wat die troue bygewoon het. Die egpaar het twee kinders gehad en is in 1978 geskei.

Margaret is dikwels beskou as ’n omstrede lid van die koninklike familie. Sy het negatiewe publisiteit oor haar egskeiding ontvang en is romanties met verskeie mans verbind. Veral haar romanse met Roddy Llewellyn, wat 17 jaar jonger as sy was, het opspraak gewek.

Afsterwe

Haar gesondheid het in die laaste twee dekades van haar lewe geleidelik agteruitgegaan; sy was haar hele volwasse lewe ’n strawwe roker en het in 1985 ’n longoperasie ondergaan, in 1993 longontsteking opgedoen en tussen 1998 en 2001 minstens drie beroertes gehad.

Sy is op 9 Februarie 2002 op 71 in die Koning Eduard VII-hospitaal in Londen oorlede nadat sy nog ’n beroerte gehad het.

Bronne

• Crawford, Marion (1950), The Little Princesses, Londen: Cassell and Co 
• Heald, Tim (2007), Princess Margaret: A Life Unravelled, Londen: Weidenfeld and Nicolson, ISBN 978-0-297-84820-2 
• Warwick, Christopher (2002), Princess Margaret: A Life of Contrasts, Londen: Carlton Publishing Group, ISBN 0-233-05106-6 

Eksterne skakels

• Profiel op die amptelike webtuiste van die Britse monargie
• Wikimedia Commons het meer media in die kategorie Prinses Margaret, Gravin van Snowdon.
• Hierdie artikel is vertaal uit die Engelse Wikipedia