Jonker-diamant
Die Jonker-diamant is een van die besonder groot diamante wat nog ooit gevind is.
Hierdie diamant is op 17 Januarie 1934 op die Byenespoort-spoedelwery op die plaas Elandsfontein ontdek. Dit is 4,8 km suid van die Premiermyn en 40 km oos van Pretoria. Dit is gevind deur die 20-jarige seun van die delwer Johannes Jacobus (Koos) Jonker nadat Koos al vir 18 jaar in die streek geprospekteer het.
Dit was ‘n wit steen van 726 karaat, 36,5 mm lank, 38 mm hoog en 25 mm breed. Op daardie tydstip was hierdie diamant, omtrent so groot as ‘n hoendereier, op drie na die grootste diamant wat nog ooit gevind is.
Op 18 Januarie 1934 is die steen vir £70 000 aan Ernest Oppenheimer verkoop. Kort daarna is dit vir £150 000 verkoop aan die diamanthandelaar Harry Winston (1896-1978) van New York. Hy het die steen in 13 dele laat kloof, waarvan die grootste afsnit, bekend as Jonker I, 142,90 karaat weeg. In 1977 is die Jonker I vir $2 259 000 verkoop aan ‘n onbekende persoon wat waarskynlik in Hongkong woon.
Bibliografie
[wysig | wysig bron]- famousdiamonds.tripod.com