Tuisblad

Welkom by Wikipedia, die vrye ensiklopedie wat deur enigiemand verbeter en uitgebrei kan word.	Vrydag, 22 November 2024 Hier is tans 120 032 artikels in Afrikaans.
Help ons om ’n wêreldklas-ensiklopedie in Afrikaans te skep.

Inleiding • Hulp • Kontak

Gebruikersportaal • Voorbladartikels • Kategorieë • Stel ’n vraag

Voorbladartikel

Nineve (Akkadies: Ninua; voorheen Ninevé in Afrikaans) is ’n antieke Mesopotamiese stad aan die oosteroewer van die Tigrisrivier; dit was die hoofstad van die Nieu-Assiriese Ryk en ’n belangrike kruispunt van handelsroetes op die Tigris. Dit het veral tydens die bewind van koning Assurnasirpal II begin floreer. Die stad het tussen 100 000 en 150 000 inwoners gehad. In sy mure was 15 poorte en ’n uitgebreide stelsel van 18 kanale het water uit die heuwels na Nineve vervoer.

Dit was sowat 50 jaar lank die grootste stad in die wêreld. Die voorspelling van die verwoesting van Nineve in die Bybel het later gelei tot die berou en redding van die inwoners. Dit is egter eindelik in 612 v.C., ná ’n bitter tydperk van burgeroorlog in Assirië, verwoes deur ’n ongewone koalisie van voormalige inwonervolke, die Babiloniërs, Mede, Perse, Galdeërs, Skitiërs en Kimmeriërs. Die stad se ruïnes lê oorkant die rivier van die moderne stad Mosoel in Irak. Die twee belangrikste grafheuwels binne die stadsmure is Kouyunjik, die Noordelike Paleis, en Nabi Joenoes.

Uitgrawings word sedert die 19de eeu op die terrein gedoen, en talle paleise en tempels is al ontdek. Van die stadspoorte is ook gerekonstrueer. Groot kommer bestaan egter tans oor die agteruitgang van die terrein, veral weens moderne uitbreidings in die gebied, plundery en die optrede van die ekstremistiese militantegroep Isis.

...lees verder

In die nuus

Britse natuurlewe-organisasies reken dat die dunbekwulp (Numenius tenuirostris) uitgestorwe is.
Nadat die BDP tydens die algemene verkiesing op 1 November 2024 vir die eerste keer sedert onafhanklikwording in 1966 nie meer ’n volstrekte meerderheid behaal het nie, het die sittende president Mokgweetsi Masisi die regeringsmag aan die UDC oorhandig, waarna Duma Boko as sy opvolger ingesweer is.
Tydens oorstromings in Suidoos-Spanje is meer as 215 mense dood, terwyl 2 000 nog vermis word.
Die titelverdediger Emirates Team New Zealand, Taihoro wen die America's Cup teen die uitdager INEOS Britannia, Britannia RB3 uit die Verenigde Koninkryk.
Die 2024-Nobelprys vir Ekonomiese Wetenskappe word toegeken aan Daron Acemoglu, Simon Johnson en James A. Robinson "vir studies oor hoe instellings gevorm word en welvaart affekteer".

Het u geweet...

... dat water sy hoogste digtheid by 4°C bereik? Hierdie eienskap is belangrik vir waterorganismes en kom in slegs twee ander stowwe voor.

... dat die Groot en die Klein Magellaanse Wolk na Ferdinand Magellaan vernoem is, maar dat Al Soefi dit reeds meer as 500 jaar voor hom opgeteken het? Hy verwys daarna in sy "Boek van sterre" wat uit 964 dateer.

... dat die Deense wiskundige Piet Hein 'n superellipsvorm gebruik het om die Sergels Torg-verkeersirkel in Stockholm, Swede te ontwerp?

... dat die Hughes H-4 Hercules, een van die grootste vliegtuie wat ooit vervaardig is, slegs een keer gevlieg het?

... dat 'n lid van die Britse koningshuis in Suid-Afrika gesterf het? Prins Christian Victor van Sleeswyk-Holstein het tydens die Anglo-Boereoorlog op 29 Oktober 1900 in Pretoria aan maagkoors gesterf.

Vandag in die geskiedenis

22 November: Alfabetdag in Albanië, Kosovo en Noord-Masedonië (1908).

1307 – Pous Clemens V laat alle Tempeliers in Europa arresteer.
1718 – Die Engelse seerower Edward Teach (beter bekend as Blackbeard) sterf aan die kus van Noord-Carolina in 'n seeslag met die Britse skip HMS Pearl.
1963 – In Dallas, Texas, sterf John F. Kennedy in 'n sluipmoordaanval en word Lyndon B. Johnson ingehuldig as die 36ste President van die Verenigde State van Amerika.
1975 – Juan Carlos word koning van Spanje ná die afsterwe van Francisco Franco.
1986 – Mike Tyson word die jongste wêreld-swaargewig bokskampioen.

Voorbladbeeld

Die Televisietoring van Berlyn van onder af gesien. Die toring, wat naby Alexanderplein in die sentrum van die Duitse hoofstad geleë is, is van 1965 tot 1969 deur die regering van die destydse Duitse Demokratiese Republiek (Oos-Duitsland) opgerig. Dit was bedoel om beide 'n simbool van Kommunistiese mag en van die stad te wees en is tot vandag toe een van sy landmerke.