Gaza

Cità palistinisa, Gaza duna lu nomu puru a l'omònima striscia di tirritoriu tra lu cunfini egizzianu, lu disertu israelianu, e lu stremu sud esti dû mari Meditirraniu, chi nzèmmula â Cisgiordania forma lu tirritoriu di l'auturità palistinisa.

Cità d'orìggini assai antichi, Gaza fu a lu nizziu di l'èbbica cristiana nu fuculari dâ diffusioni dû cristianèsimu. Mònici comu S. Ilariuni, foru assai attivi attraversu viaggi pi tuttu lu tirritoriu di lu mperu remanu di l'èbbica.

La striscia di Gaza

Oi la striscia di Gaza è n'ària nica-nica misa ppi longu ntâ costa dû Miditirràniu, tra l’Eggittu e l'Israeli, longa 40 chilòmitri e làrica 10, unni càmpanu cchiossai di 1,4 miliuna di palistinisi, cu na dinzitati abbitativa, dunca, di 3.500 pirsuni pi chilòmitru quatratu.

Li cunfini vìnniru stabbiliti ntô 1948, doppu ca si criàu lu statu d’Israeli. Nzinu ô 1967 vinni accupata di l'Eggittu e, appoi, passau sutta a Israeli. Ntô 2005 l’asèrcitu srailianu s'arritirau dâ "Striscia", ma cuntìnua a cuntrullàrini li cunfini, lu spazziu aèriu e lu mari.

Ecunumìa

La pisca, ca era l'attivitati principali, vinni pruibbita ntô 2006 e 35.000 pirsuni, ca campàvanu cu idda, ristaru senza sustegnu ecunòmicu.
Tutta la pupulazzioni campa nta na situazzioni ecunòmica e suciali assai-assai malamenti e dipenni cumpretamenti di l'aiuti assistinziali, e chistu macari picchì li cuntìnui chiusuri dê vàlichi nun pirmetti li spuratazzioni. Macari lu "Prucramma munniali pi l'alimentazzioni" dê Nazzioni Uniti (WFP) fici n'appellu suttaliniannu ca la cumunitati ntirnazziunali avissi a pigghiari comu urgentìssima e priuritària la suluzzioni dâ traggèdia umanitària di Gaza.