Wikipedia

Philosophical Transactions of the Royal Society

Die Philosophical Transactions of the Royal Society (Phil. Trans.) is 'n wetenskapsjoernaal gepubliseer deur die Royal Society. Dit het in 1665 ontstaan, wat dit die eerste joernaal ter wêreld maak wat uitsluitlik aan wetenskap gewy is. Dit is sedertdien ononderbroke gepubliseer, wat dit ook die langsverskynende wetenskapsjoernaal maak. Die effens vroeëre Journal des sçavans kan ook aanspraak maak as die eerste wetenskapsjoernaal, alhoewel dit 'n ook wye verskeidenheid nie-wetenskaplike materiaal bevat het.[1] Die gebruik van die woord "philosophical" in die titel, is afgelei van die frase "natuurfilosofie", wat ekwivalent was aan wat vandag generies as "wetenskap" bekend sal staan.

Voorblad van die eerste band van Phil. Trans., wat die jare 1665 en 1666 omvat

Geskiedenis

wysig

Die eerste uitgawe, gedateer 6 Maart 1665, is geredigeer en uitgegee deur die society se eerste sekretaris, Henry Oldenburg, sowat ses jaar na die Royal Society se stigting.[2] Oldenburg het die joernaal op sy persoonlike onkoste uitgegee en blyk 'n ooreenkoms met die raad van die Royal Society aan te gegaan het, wat hom sou toelaat om enige restante wins te behou. Hy sou egter teleurgestel word, aangesien die joernaal in Oldenburg se leeftyd finansieel swak presteer het.[3] Oor die eeue is verskeie belangrike wetenskaplike ontdekkings in die Philosophical Transactions gepubliseer. Beroemde bydraende outeurs sluit in Isaac Newton, James Clerk Maxwell, Michael Faraday en Charles Darwin. In 1672 het die joernaal Newton se eerste verhandeling New Theory about Light and Colours gepubliseer,[4] wat gesien kan word as die begin van sy publieke wetenskapsloopbaan. Die posisie van redakteur is soms gedeel, en het William Musgrave (Nrs 167 tot 178) en Robert Plot (Nrs 144 tot 178) ingesluit.[5]

Huidige publikasie

wysig

In 1887 is die joernaal uitgebrei en geskei in twee afsonderlike publikasies, een vir die Fisiese wetenskappe (Philosophical Transactions of the Royal Society A: Physical, Mathematical and Engineering Sciences) en die ander vir die Lewenswetenskappe (Philosophical Transactions of the Royal Society B: Biological Sciences). Beide joernale publiseer tans tematiese onderwerpe en onderwerpe voortspruitend uit verhandelinge wat aan die Besprekingsvergaderings van die Royal Society voorgelê word. Oorspronklike navorsingsartikels word uitgegee in die sustersjoernale Proceedings of the Royal Society, Biology Letters, Journal of the Royal Society Interface, en Interface Focus.

Verwysings

wysig
  1. ↑ "Special Collections | The Dibner Library of the History of Science and Technology" (in Engels). Geargiveer vanaf die oorspronklike op 19 September 2011. Besoek op 17 April 2010.
  2. ↑ "Philosophical Transactions of the Royal Society of London – History" (in Engels). Geargiveer vanaf die oorspronklike op 6 November 2018. Besoek op 6 Februarie 2010.
  3. ↑ "Henry Oldenburg, F.R.S. (c. 1615–1677)" (PDF). Besoek op 16 April 2010.
  4. ↑ "A Letter of Mr. Isaac Newton, Professor of the Mathematicks in the University of Cambridge; Containing His New Theory about Light and Colors: Sent by the Author to the Publisher from Cambridge, Febr. 6. 1671/72; In Order to be Communicated to the R. Society — Philosophical Transactions" (in Engels). Geargiveer vanaf die oorspronklike (PDF) op 2 Februarie 2017. Besoek op 6 Februarie 2010.
  5. ↑ A. J. Turner, ‘Plot, Robert (doop. 1640, oorl. 1696)’, Oxford Dictionary of National Biography, Oxford University Press, 2004

Eksterne skakels

wysig
Ontsluit van "https://af.wikipedia.org/w/index.php?title=Philosophical_Transactions_of_the_Royal_Society&oldid=2234874"